‘Kawatan’ misud sa apartelle napusilan patay

CEBU, Philippines -  Usa ka lalaki ang gipusil patay sulod sa Aloha Apartelle diha sa dalan Echavez sa barangay Zapatera dakbayan sa Sugbo kagahapon sa tungang gabii.

Ang biktima gihulagway lang nga nagpangidaron og 35-anyos, adunay gitas-on nga 5’2, nagsul-ob og yellow nga t-shirt ug gray nga shorts. Dunay pagdudang ‘kawatan’ kini nga misud sa maong establisamento. Base sa gibutyag sa usa ka John Labis,42, nga iyang nadunggan ang kusog kaayong lanog sa buto sa armas ug adunay nag-agulo. Sa iyang pagsusi naghapla na ang biktima.

Tungod niini, daling nangayo og tabang si Labis sa tagdumala sa maong apartelle apan ang gwardiya lamang nga si Andy Flores nga nag-duty nianang gabhiuna ang diha apan wa na usab kini igkita bisan nangabot na ang mga polis. Nakuha gikan sa biktima mao ang tsinelas nga iyang gibutang sa iyang duha ka kamot, screw drivers, nail cutter ug coin purse.

Sa pakighinabi sa Banat News ni PO1 Merlo Laborte sa Homicide Section, gituohan nilang kawatan ang maong lalaki nga napatay ug nagduda silang ang gwardiya maoy mipusil niini. (BANAT NEWS)