CEBU, Philippines - Gimando ni Mayor Michael Rama ngadto sa iyang mga sakop nga pugson pagpapahawa ang mga tawo nga magbabag sa agianan paingon sa Sitio Bato, Ermita aron dili sila makapalangay sa clearing operation sa maong dapit.
Si Raquel Arce nga maoy gitugyanan ni Rama sa pagpahigayon og clearing operation mi-report nga adunay mga tawo nga mibabag kanila.
Gitataw ni Rama nga wala mausab ang iyang baruganan nga kadtong mga tawo nga magsamok-samok sa kalihukan sa City Hall angay’ng pasakaan og kaso. Ang mga technical personnel sa City Hall kagahapon mipresentar na og mga plano kabahin sa reblocking sa Sitio Bato apan gipatun-an pa kini pag-ayo ni City Administrator Jose Marie Poblete.
Si Poblete nagkanayon nga base sa sugyot sa mga technical personnel nga ang matag lote bahinon og tag 16 metro kwadrado ang gidak-on. (Rene U. Borromeo/EIM) (BANAT NEWS)