CEBU, Philippines - Nagka-tensyon ang mga kandidato sa Liberal Party kagahapon human sa pagpirma nila sa peace covenant nga gipasiugdahan sa Cebu-Citizens Involvement and Maturation in People’s Empowerment and Liberation Foundation Inc. (C-CIMPEL), kapolisan, Comelec ug simbahan.
Kini human magkasumpaki ang kandidato sa pagkamayor nga si Efraun “Jun†Pelaez ug kandidato sa pagka-konsehal nga si Rufo Bering kinsa buot ni Pelaez nga di na pasuoton og LP nga t-shirts kay gitaktak na sila sa partido.
Apan sumala pa sa report sa TV Patrol Central Visayas kagahapon, si Bering mitubag nga walay ikapakitang dokumento si Pelaez nga nagpamatuod nga gitaktak na si Bering sa partido.
Ang peace covenant signing gihimo diha sa Nuestra Señora de Regla Parish National Shrine nga gitambongan sa lokal nga mga kandidato apan wala motambong si Mayor Paz Radaza ug ang iyang lineup.
Si Rev. Fr. Jaime J. Duero maoy nangulo sa Santos nga Misa diin iyang gihulagway nga ang pagpamalit og botos usa ka yawan-ong binuhatan.
“No vote buying because it is a sin. Ang kagubot ug kasamok mao kang satanas,†matud pa ni Duero sa iyang homily. (BANAT NEWS)