CEBU, Philippines - Patay ang usa ka panday human matusok sa tubo sa scaffolding nga gipatongan sa gatosang mga kabilya sa gitrabahoang building pasado alas-10 sa miaging gabii diha sa sitio Sudlon barangay Pari-an ning dakbayan.
Ang biktima nailhan nga si Rico Lee, 48, taga lungsod sa Pinamungajan ug usa ka panday.
Matud pa sa kauban ni Lee nga si Maximo Benigay nga bag-ohay lang nga nangabot ang mga dagkong kabilya nga adunay gibag-on nga 25 cm ug gitas-on nga 750 m.
Dugang pa ni Benigay nga samtang nag-file sila sa 160 ka mga kabilya, kalit lang nga nahugno ang gipatungan sa mga kabilya.
Nakadagan si Benigay apan naabtan ang iyang tiil. Apan mas grabe si Lee tungod kay diha kini sa ilawom dihang nahugmak ang scaffolding ug wala na makadagan maong nadat-ugan sa mga kabilya.
Pag-ugkat sa Emergency Rescue Unit Foundation sa biktima nag-ubo si Lee apan natusok kini sa puthaw diha sa iyang dughan, gusok ug kuto-kuto nga gituohang maoy naingnan sa iyang hinanaling kamatayon.
Matod pa ni PO1 Michael Angelo Singson sa Homicide Section sa Cebu City Police Office nga sa ilang pakisusi sa dapit way gisuot nga safety gear ang biktima ug kaubanan niini.
“Kuwang gyud sila og safety gear, permanente baya gyud nang safety, naa lang gyud silay pabaya,†pasabot pa ni Singson.
Nagplano karun ang kapolisan nga imbitahon ang contractor sa biktima kini aron mapaubos usab sa imbestigasyon.
Sa nasayran si Lee, giingong usa pa lang ka buwan nga nagtrabaho sa Winland Tower Construction diin magdawatan sila og sweldo nga P300 kada adlaw. (BANAT NEWS)