Piniriso sa Dumanjug nakapuga

CEBU, Philippines - Nakapuga gikan sa prisohan  sa Dumanjug Police Station ang usa ka sakop sa gituohang gun for hire  pinaagi  sa paglusot sa kisame  sa selda  niini  kagahapon pasado alas 3:00  sa kaadlawon.

Ang nakaeskapo mao si Leomar Angana, taga barangay  Candabong sa maong lungsod  kinsa  nag-atubang  sa kasong kalapasan sa illegal possession of firearm and explosives.

Sa pakighinabi sa Banat News sa hepe sa Dumanjug Police Station nga  si Insp. Robert Lucernas nga ang  maong  piniriso  nakita  pa  sa  iyang desk officer nga si SPO2 Florencio Clarion  nianang tungang gabii  sa  iyang  una ug ikaduha  nga  pag-head count  sa  mga  piniriso.

Apan  sa ika-tulo  niyang  pagsusi  14 na lang  ang  mga  piniriso  gikan  sa 15  hinungdan nga dali   kini  niyang  gisuta.

Didto  nakita niya  ang  senina  ni  Angana  nga  gihikot  sa kabilya  sa bintana  sa selda   ug  gilatayan  niya  ngadto  sa kisame. Matud pa ni Lucernas nga   sayon  ra kaayong  gipamawog  ni  Angana   ang  mga  kabilya  ug  dali  kaayo  siyang  nakapuga  nga  wala  madiskobrehe  sa iyang  mga  kauban.

Si Angana, nasikop  niadtong Abril 4, 2013 uban sa upat niini ka kauban nga mao ang iyang maguwang nga si George, Bobby Dela Cerna, igsuon niini nga sila  si Jimmy ug Ruel sa usa ka payag didto sa bukirang bahin sa barangay Pawa sa maong lungsod.

Gipadayag usab ni Lucernas nga andam siyang modawat sa bisan unsang silot nga ipahamtang kaniya tungod kay iya man nga command responsibility ang lima ka polis nga nadestino niadtong tungora.  (BANAT NEWS)