CEBU, Philippines - Naugdaw ang 11 ka mga balay sa kalit nga pag-ulbo sa kalayo sa nahitabong sunog sa purok Ilang-Ilang, sitio Grancena sa barangay Opao, dakbayan sa Mandaue alas 3:41 ang takna kagahapon sa kaadlawon.
Si SFO3 Roy Garcia, imbestigador sa Bureau of Fire Protection (BFP) sa maong dakbayan miingon nga nagsugod ang kalayo sa panimalay ni Bernardo Alicante ug mitapon kini ngadto sa laing napulo pa ka mga balay nga sikbit niini.
Matud pa ni Garcia nga ang laing panimalay nga gisundan na usab sa pagsilab sa kalayo maoy ilang gipuntariya sa pagpasirit og tubig nga maoy hingpit kini nilang napakgang ang pagkatap sa kalayo ngadto sa mga sikbit pa niini nga ang tanan ilang gibanabana ang danyos sa kantidad nga P120,000.
Dugang pa niya ilang gipaubos sa Task Force Alpha ang maong sunog nga maoy hinungdan sa pagtubag usab sa uban pang kabomberohan sa Sugbo nga naglakip sa Consolacion, Lapulapu City, Cebu City, barangay Tipolo Volunteers Fire Brigade, Chinese Filipino Fire Volunteer Fire Brigade, Emergency Rescue Unit Foundation , (ERUF) Accident Control Emergency and Response Team (ACERT) ug uban pa.
Kadaghanan sa mga nasunog nga panimalay pulos ginama sa light materials. Wa pa matino ang hinungdan niini. (BANAT NEWS)