CEBU, Philippines - Nakaangkon og bun-og sa kalawasan ang usa ka polis human sila gikatahong gilamok og kulata sa mga tawo pasado alas-5 sa kahaponon sa miaging adlaw sa barangay Ibabao dakbayan sa Mandaue.
Ang labihang bun-oga mao si PO1 Mar Expedito Villamonte; samtang PO2 Jason Esprera ug PO2 Michael Cortes pulos way nahimo tungod sa kadaghan sa mibanos-banos og bun-og sa ilang kaubang polis.
Nailhan hihuon ang upat ka mikulata kang Villamonte nga mao sila si Jonas Desuyo, Saldi Perez ug Gala Remundo. Nasikop usab ang usa ka dispatser nga maoy na-ingnan sa kagubot nga si Erwin Mendaros. Sa pakighinabi sa Banat News ni PO2 David Umambac, sa Police Station 1 Mandaue City, mipadayag kini nga ang tulo ka pulis adunay gi-follow-up nga kaso sa maong dapit.
Giingong naatlan nila si Mendaros nga nag-dispatch og mga pasahero hinungdan nga ila unta kini nga sikopon tungod sa paglapas sa Anti-Dispatching City Ordinance.
Gikatahong milugnot kini ug misuway sa pag-ikyas apan ang komosyon nakaagni sa ubang mga tawo lakip na kang Perez sa pag-apil og gikulata kang Villamonte. Gihulagway ni Umambac nga kun gitang-tang pa ni Villamonte ang gisul-ob niining helmet posibleng maguba ang nawong niini tungod sa kadaghan sa mitabang og kulata.
Kasong direct assault ang ipasaka batok sa mga suspek. (BANAT NEWS)