CEBU, Philippines - Daling gidala sa iyang mga kauban ngadto sa Talisay City District Hospital si Cepriano Castañares, 58-anyos, taga barangay Candulawan, Talisay.
Ang guard on duty sa TCDH nga si Felicisimo Tibay Jr. mibutyag sa mga tigbalita kagahapon nga pasado alas 8:00 sa buntag nahagbong gikan sa multicab ang biktima ug nakaangkon kini og samad sa ulo.
Si Castañares gi-refer kini sa doktor sa TCDH ngadto sa Vicente Sotto Memorial Medical Center nianang pagkabuntag apan giingong mibalibad kini ug mipirma og waiver nga dili na siya magpadala ngadto sa laing tambalanan ug mopauli na lang siya tungod kay sa iyang pamati dili grabe ang iyang kahimtang.
Apan pasado ala-una kagahapon sa hapon si Castañares mibalik kini diha sa TCDH ug nagreklamo na sa kasakit sa iyang ulo ug mihangyo na kining mangayo na lang og referral ngadto sa laing tambalanan hinungdan nga gihatagan kini og referral sa doktor sa TCDH ngadto sa VSMMC.
Giingong si Castañares diha kini maglingkod sa likod nga bahin sa multicab ug kompiyansa kaayo kini samtang naghunong ang sakyanan tungod kay nahuot sa trapiko ug dihang milarga na ang sakyanan wala makatarong og panggunit ang biktima hinungdan nga nahayang kini ug natagak.
Si Richel Bacaltos, campaign manager sa Alayon Party nagkanayon kini nga duna na sila’y gipadalang tawo ngadto sa tambalanan nga mosusi sa sitwasyon sa biktima aron mahatagan kini og pinansiyal nga hinabang. (/WC) (BANAT NEWS)