CEBU, Philippines - Kritikal ang kahimtang sa usa ka traffic enforcer human kini pusila sa upat ka wala hiilhing mga lalaki didto sa Barangay Poblacion, lungsod sa Cordova sa milabay’ng gabii.
Ang biktima mao si Deomides Pacaldo, 43, nga taga barangay Buagsong sa maong lungsod ug usa ka traffic enforcer sa Cordova.
Sa pasiunang imbestigasyon sa kapolisan sa Cordova nasayran nga sa alas 11:30 sa milabay’ng gabii samtang nakig-inom ang biktima uban sa iyang mga higala didto sa ilang lugar, kalit lang mihunong sa ilang a atubangan ang usa ka motorsiklo.
Dayon usa sa upat ka tawo nga sakay niini maoy mipusil sa biktima nga nagtalikod niadtong higayona.
Si Pacaldo naigo sa iyang bukobuko ug ang bala milahos sa iyang bukton.
Human maigo ang biktima, mipadagan usab dayon sa ilang sakyanan ang mga kriminal pahilayo sa maong dapit , samtang gihatud dayon ang biktima ngadto sa Mactan Doctors Hospital ubos sa tandugon nga kahimtang.
Padayon pa nga giimbistigar sa kapolisan ang maong hitabo ug gisuta kun wala bay labot sa iyang trabaho isip traffic enforcer ang pagpusil kaniya.
(BANAT NEWS)