Ulitawo gipusil patay sa barkada

CEBU, Philippines - Namatay  ang usa ka factory worker human kini pusila  sa  iyang  higala  samtang  nagsusapinday  sa kahubog  nga  naglakaw  sa karsada didto sa barangay Sandayong Norte sa siyudad sa Danao   sa miaging   Lunes  sa gabii.              

Ang biktima mao si Kim Perez, 23, ulitawo, usa ka factory worker,  ug molupyo sa nahisgutang lugar.                Samtang ang suspek mao ra ang iyang barkada nga si Reel Entiro, 43, biyudo, drayber,  nga silingan  sa   biktima.               

Si PO3 Arnold Labini, desk Officer sa Danao City Police  Station  mibutyag  sa Banat  News  nga ang biktima ug ang suspek nag- inom sa wala pa ang hitabo  ug  dihang  nangalasbag  na  mitumaw  ang  ilang  lalis.

Nasuta  nga   miuna sa pagpauli   ang suspek apan  ang  biktima  kinsa   nagwandog-wandog  sa kahubog  misunod   usab  sa pagpauli  apan walay  kalibotan  nga  giatangan  kini  sa  suspek  ug  sa  pag-abot  sa awaaw  nga  lugar  gipusil  kini   sa makadaghang  higayon.               

Ang biktima   nga nakaangkon og samad pinusilan sa dughan, tiyan  ug nagkalain-laing  bahin  sa lawas    gihatud  dayon  sa  mga  silingan   ngadto  sa Danao City District Hospital   diin  kini  ideklarar nga Dead on Arrival  (DOA).                Hinuon ang suspek nadakpan   usab  dayon sa  mirespondi nga mga polis apan wala na mabawi  ang  iyang  revolver  nga kalibre .38 nga maoy iyang gigamit  sa maong   krimin tungod  kay nawagtang  kuno.               

Nabalhug   dayon  kini  sa karsel samtang  gihikay   sa kabanay  sa  biktima ang  kaso  nga  ipasaka  batok     kaniya. (BANAT NEWS)