CEBU, Philippines - Walo ka classroom sa duha ka building sa Candulawan Elementary School ug laing duha ka classroom sa high school ang naugdaw ug laing usa ang partially burned sa nahitabong sunog kagahapon sa hapon diha sa barangay Candulawan, dakbayan sa Talisay.
Si SFO1 Jeffrey Tajanlangit sa Talisay City Fire Station mibutyag sa Banat News kagahapon nga ang maong insidente nahitabo pagkahuman sa tunga sa adlaw nga recognition ug nianang pagkahapon gikatakda ang graduation ceremony sa mga mogradwar.
Matud ni Tajanlangit nga usa ka residente sa lugar kinsa mitabang og pagpanghakot sa mga butang sa tunghaan ang naangol.
Ang sunog naggikan sa kisame sa atop sa classroom sa replacement teacher nga si Mrs. Marivic Birot sa grade six.
Duha ka building diin usa niini ang gilangkuban sa tulo ka classroom sa grade one, usa sa grade four ug usa sa grade six samtang laing building nga gilangkuban sa mga classroom sa grade four, five ug six ang nangaugdaw.
Mitapon ang kayo sa laing tulo ka classroom sa high school diin duha niini ang nangaugdaw usab ug ang usa partially burned.
Mga alas 12:50 nadawat sa kabomberohan ang alarma sa sunog ug nakontrolar kini ala 1:05 sa hapon.
Gibana-banang mokabat ngadto sa P500 mil ang danyos sa sunog.
Bisan og naugdaw na ang mga classroom gipadayon gihapon ang graduation ceremony kagahapon sa hapon. (BANAT NEWS)