P38 mil cash gikiriw sa wa ilhing mga kawatan
CEBU, Philippines - Mikabat og P38 mil ang kuwarta ug nagkalainlaing mga butang nga naglakip sa duha ka lisensyadong armas de fuego ang gisakiyo sa duha ka wala hiilhing kawatan nga milungkab sa pinuy-anan sa usa ka tigpatanto og kuwarta sa barangay Pitalo lungsod sa San Fernando niadtong Huwebes sa alas 12:15 sa udto.
Ang biktima mao si Ritchie Sasuman Dela Cruz, 38, minyo, nagpuyo sa maong lugar ug tigpatanto og kuwarta.
Ang mga nahanaw nga butang mao ang 1 ka laptop nga mokantidad og P25 mil cash nga P38 mil, 1 sterlink server, P20 mil, ug duha ka lisensyadong kalibre .45 nga armas.
Duha ka mga lalaki nga nagsakay og motorsiklo ang gitumbok nga responsabli sa maong krimen.
Si PO3 Marjurkin Misuari sa San Fernando Police Station mibutyag sa Banat News nga ang pamilyang Dela Cruz nanglarga ngadto sa siyudad sa Sugbo apan nakurat sila sa ilang pag-uli nga abli na ang pultahan sa atubangan sa ilang balay.
Sa ilang pagsusi sa sulod sa ilang balay bukas na ang pultahan sa ilang lawak ug nawagtang na ang P38 mil nga gisulod sa ilang hunos lakip ang mga butang nga nahisgutan na.
Ang mga silingan sa biktima nakamatikod sa duha kabatan-ong kawatan nga nag-jacket og puti ang usa niini. Ang biktima igo na lang sa pagdangop sa buhatan sa kapolisan, ug mao usab karon ang gipanid-an sa mga polis sa maong lugar pamasin nga mailhan ang maong mga kawatan. (BANAT NEWS)
- Latest
