Dul-an 500 VK, molemole ug slot machines gipangguba
CEBU, Philippines - Dul-an kinyentos ka mga illegal gambling machines ang gipangguba sa kapolisan kagahapon sa buntag diha sa Cebu Provincial Police Office (CPPO).
Ang mga illegal electronic gambling machines naggikan sa kapolisan sa Lapu-lapu City Police Office; Mandaue City Police Office, Cebu Provincial Police Office, Cebu City Police Office ug Regional Headquarters.
Ang hepe sa kapolisan sa Rehiyon 7, Chief Supt. Marcelo Garbo Jr.mihulagway nga resulta sa gihingusgang kampanya batok sa illegal gambling ang maong mga makina.
Ang CCPO nakasakmit og 400 ka makina. Apan tungod sa subsob nilang operasyon gipasakaan usab sila og kaso sa mga tag-iya sa amusement centers diin nakuha ang ubang mga makina.
Si Garbo maoy unang mibukbok sa mga makina ginamit ang maso ug gisunod dayon ang pagguba sa nahibiling mga makina gamit ang payloader.
Gipasanginlan usab ang mga polis nga ilegal ang pagsakmit tungod kay duna man silay mga business permits.
Apan sumala pa ni Chief Insp. Romeo Santander, hepe sa Criminal Intelligence Branch sa CCPO, mipagawas og certification ang Philippine Charity Sweepstakes Office (PCSO) nga nag-ingong wala sila’y giisyu sa maong mga amusement center aron makabutang og bingo slot machines. (BANAT NEWS)
- Latest
