CEBU, Philippines - Giuyonan sa mga sakop sa Konseho sa Dakbayan nga ang Cebu City Medical Center padawaton na og mga tinun-an nga motungha diha sa CCMC College of Nursing bisan og sila dili lumulopyo sa dakbayan sa Sugbo.
Apan kinahanglan nga ang maong tinun-an nga dili taga dakbayan sa Sugbo adunay paryente nga lumulopyo gyud dinhi sa siyudad ug nga kinahanglan nga motambong kini kun may ipatawag nga tigum sa tunghaan.
Si Konsehal Roberto “Bob†Cabarrubias maoy misugyot nga padawaton na ang CCMC College of Nursing og tinun-an nga dili taga dakbayan sa Sugbo kay nagkaminus na ang mga mikuha sa maong kurso diha sa maong tunghaan.
Matud ni Cabarrubias nga alkanse ang CCMC College of Nursing sa miaging tuig tungod kay mas daku ang iyang gasto kay sa iyang kita.
Apan si Mayor Michael Rama miingon nga ang CCMC College of Nursing wala gitumong aron makaganansya ang dakbayan kun dili aron kini makatabang sa mga tinun-an nga gustong makahuman sa kurso nga Nursing.
Niadtong 2008 nakakuha og maayong record ang maong tunghaan dihang sa 117 ka bag-ong nursing graduate nga mikuha og pasulit sa Nursing Licensure Examination, ang 114 kanila nakapasar. (BANAT NEWS)