CEBU, Philippines - Patay diha-diha ang usa ka ulitawo human mapantok ang ulo sa punoan sa tugas nga gidasmagan sa motorsiklo nga iyang gisakyan didto sa highway sa Sitio Mountain Breeze, barangay Pandan siyudad sa Bogo kagahapon sa alas 3:20 sa kaadlawon.
Ang biktima mao si Ramonito Quijote Sokayre, 39 anyos, ulitawo, ug molupyo sa nahisgutang lugar.
Si PO2 Zeniff Dungog sa Bogo City Police Station mibutyag sa Banat News nga nagpaingon sa barangay Gairan, dakbayan sa Bogo ang biktima dihang sa iyang pag-abot sa maong lugar kalit lang milabang ang usa ka iro.
Hinuon bisan wala makabantay apan nakalihay ang motorsiklo, apan kalit nga nawad-an kini og preno ug mitipas kini og karsada ug midasmag sa punoan sa kahoy nga tugas.
Maayung pagkapantok sa ulo sa biktima sa ponuan sa tugas ug nakita sa mga nakasaksi nga mikipig kini dihang mitugpa sa yuta.
Gihulagway nga patay diha- diha ang biktima nga wala na madala pa sa tambalanan tungod sa kadaut sa iyang ulo.
Gidudahan usab nga posibling nakainum og alak ang biktima nga nagmaniho sa iyang motorsiklo nga matud pa sa ubang mga saksi kusog kaayong nagpadagan bisan wala magsul-ob og helmet. (/WC)(BANAT NEWS)