Magsoong negosyante’g shabu priso

CEBU, Philippines - Nasikop sa kapolisan sa Isla sa Olango ang magsoon nga negosyante  og  gidiling  drugas atol sa usa ka buy bust operation sa milabay’ng adlaw.

Ang nasikop mao si Kim Maranga, 20, ulitawo ug ang iyang igsoon nga si Rodolfo Maranga, hingkod ug  pulos mga residente  sa Brgy. Sta. Rosa, Isla sa Olango dakbayan sa Lapulapu.

Ang pagkasikop  sa  mga suspek  nahimo  human ang kapolisan sa presinto I, sa maong isla  nakadawat  og impormasyon   kalabot  sa kakusog  sa  halin sa gipamaligyang shabu  sa magsoong Maranga   hinungdan nga ila kining gipanid-an sa pipila ka adlaw.

Gumikan niini mipahigayon og drug bust operation ang kapolisan sa Olango  nga  misangpot  sa pagkasikop sa magsoong Maranga.

Nasakmit  sa kapolisan  gikan sa magsoon ang walo ka gagmay’ng pakete sa gituhoang shabu ug ang paon  nga  P500.

Kasong kalapasan sa Republic Act (RA) 9165 ubos sa Sec. 5, 11 ug 12 sa Art.II ang atubangon sa magsoong Maranga gumikan sa pagpamaligya sa illegal nga drugas.

Ang mga ebidensiya nga nakuha sa kapolisan isumiter   nila  ngadto sa PNP Crime Laboratory alang sa kompirmasyon. (/WC) (BANAT NEWS)