CEBU, Philippines - Patay ang usa ka 63- anyos nga gipusil sa gikadula og tong-it kinsa grabe usab nga naangol human gidunggab og bayoneta human ang duha nag-away diha sa sitio Catugasan, barangay Casili, lungsod sa Consolacion alas-3 pasado ang takna sa miaging kaadlawon.
Ang namatay mao si Eddie Bobo, samtang angol ang suspetsado si Celso Hermosa, 52.
Si PO2 Johnaskie Romero sa kapolisan sa maong lungsod nga nahinabi sa Banat News miingon nga nag-inom ang biktima ug suspetsado ug nagdula og tong-it uban sa pipila nila ka mga higala.
Samtang nagsugal nagkabingkil ang duha sa pusta nga gibutang sa lamesa kay giangkon man sa namatay nga iya ang kuwarta.
Matud pa ni PO2 Romero taliwala sa mainiton nilang panaglalis dali nga mipauli sa ilang panimalay si Bobo ug mibalik ug nagdala na og bayoneta ug gidiretso og dunggab si Hermosa sa ubos nga bahin sa tuong dughan niini.
Si PO2 Romero nagkanayon human sa pagdunggab, daling migawas si Bobo apan giusig kini sa iro ni Hermosa ug mao na say iyang gipahimungtan og dunggab hangtud nga namatay.
Matud ni Romero gumikan kay nalangay tungod sa iro, naabtan sa samaron nga si Hermosa nga nakakuha og armas ug gipusil sa bukobuko si Bobo.
Ang duha nga daling gidala sa ilang mga higala ngadto sa Eversely Child Sanitarium Hospital ug gibalhin sa Vicente Sotto Memorial Medical Center sa dakbayan sa Sugbo apan si Bobo gideklarar sa mga doktor nga dead on arrival.
Si Romero miingon nga nakuha nila sa crime scene ang 12-pulgadas nga bayoneta ug ang kalibre .38 nga adunay upat ka buhing bala ug usa ka kabhang sa tambor niini. (EIM)(BANAT NEWS)