CEBU, Philippines - Usa ka gipasanginlang “gun for hire†ug tigpayuhot og mga armas ang nasikop sa kapolisan diha sa Pier 4 pasado alas-4 sa miaging hapon.
Ang nasikop mao si Rosellano Bohol Jr., 25, taga barangay Binaliw dakbayan sa Danao ug giingong usa ka gun for hire. Sa nasayran, si Bohol nasikop sa kapolisan sa Waterfront Police Station pinanguluhan ni Chief Insp. Wildemar Tiu samtang kini padung unta mosakay og barko padung sa Mindanao. Matud pa nga dihang giagi na sa X-Ray machine ang bagahe ni Bohol nakuryoso ang mga gwardiya sa steel plate box sa bagahe niini.
Gamit ang acetylene torch naablihan ang maong box ug nasuta nga duna kini duha ka armas nga kalibre .45 nga dunay magazine, samtang laing taas nga extra magazine ug mga spare parts niini nga giputos pa sa carbon paper. Si Eduardo Uychiat, Chief Security Officer sa Vestina Security Services Incorporated miingon nga mas hugtan pa nila ang pagbantay ilabi na nga nagsingabot ang Semana Santa. Ang hepe sa kapolisan sa City Intelligence Branch (CIB) Chief Insp. Romeo Santander mibutyag nga dunay ‘target’ didto sa Cagayan de Oro ang suspek.
Midugang si Santander nga gun for hire ang dinakpan ug nalambigit usab kini sa usa ka pagpamusil niadtong tuig 2010. Ilaha pa karong gi-verify ang maong mga impormasyon nga ilang nakuha.
Gisuwayan pagkuha og habig sa Banat News ang suspek kun tinuod ang pasangil sa kapolisan apan napakyas ang maong tinguha.
Kasong kalapasan sa illegal possession of firearms in relation sa Comelec gunban ang ipasaka batok kang Bohol. (BANAT NEWS)