CEBU, Philippines - Napulo ka hot cars nga Honda Fit ang nasakmit sa National Bureau of Investigation (NBI)-7 niadtong Miyerkules sa buntag diha sa JJRS Car Mall Sales nga nahimutang sa North Road, Basak, Mandaue City.
Ang maong operation pinasikad sa usa ka search warrant nga giisyu ni Judge Teresita Galaneda sa Regional Trial Court, Mandaue City.
Matud ni NBI Regional Director Antonio Pagatpat, wala didto ang tag-iya sa maong baligyaanan og sakyanan nga usa ka Ricardo Sameon.
Apan bisan pa man niini, ang NBI mopasaka gihapon og kaso batok kang Sameon diha sa Prosecutor’s Office tungod sa kalapasan sa Presidential Decree 1464 as amended by Executive Order 156 o Tariff and Customs Code of the Philippines.
Sumala pa ni Pagatpat, subay sa atong mga balaod dinhi sa Pilipinas gidili ang pag -import og used vehicles dinhi.
Ang Honda Fit gituohang gikan sa gawas sa nasud tungod kay ang mismong distributor sa maong kompanya dinhi nga mao ang Honda Philippines mibutyag sa NBI nga wala sila mag-import og maong matang sa sakyanan dinhi sa Pilipinas.
“Locally, Honda Fit is not available in the country,†matud pa ni Pagatpat base sa pamahayag sa Honda Philippines. Samtang nasuta usab sa NBI nga walay napresentar nga business permit ang manager sa maong display center ug nakompirmar kini sa NBI diha sa Mandaue City Treasurer’s Office.
Giklaro ni Pagatpat nga dili Honda Philippines ang ni-request nga ipaimbestigar ang maong display center.
Sumala pa niya nga nakakuha sila og impormasyon kabahin niini gikan sa National Intelligence Coordinating Agency nga gipaagi diha sa Land Transportation Office (LTO)-Manila ug gi-forward diha sa ilang buhatan.
Si Pagatpat nagkanayun nga mohangyo siya sa korte nga ila nang iturn-over ang mga na-confiscate nga sakyanan ngadto sa Bureau of Customs.
Si LTO-7 director Raul Aguilos sa iyang bahin nagkanayon nga sukad niadtong tuig 2008 wala na sila morehistro pa og mga smuggled used cars.
“We were warning sellers and buyers na dili sila mopalit kay definitely there will come a time that the long arm of the law will catch up on them,†matud pa ni Aguilos.Sumala pa ni Aguilos dunay mga LTO personnel nga gipangkasohan nila tungod sa pagdawat og pagpalusot og mga rehistro sa mga smuggled nga sakyanan.
Kahinumdoman nga niadtong tuig 2007 minilyon ka pesos nga kantidad sa mga smuggled nga sakyanan ang nasuta nga pulos naka-rehistro dinhi sa LTO-7. (BANAT NEWS)