Gipatay sa ig-agaw kay di na gustong moinom

CEBU, Philippines - Patay ang usa ka tawo nga gidunggab sa gikainom niining ig-agaw sa barangay Jagobiao, dakbayan sa Mandaue alas- 8 pasado ang takna sa miaging  gabii. Ang namatay mao si Noli Garing, 20, samtang ang suspetsado mao si Danilo Garing, 35,  pulos nagpuyo sa maong dapit.

Si PO2  Richard Ares sa kapolisan sa maong dakbayan nga nahinabi sa Banat News miingon nga nag-inom ang manag-agaw sa atubangan sa panimalay sa ilang iyaan nga si Josephine  Garing Rosales.

Sumala pa nga gikulangan sa ilimnon ang suspek ug gisugo ang biktima sa pagpalit og dugang ilimnon apan nagdumili kini hinungdan nga nasuko ang suspek ug gihapsan og botelya ang biktima.

Ang iyaan nga si Josephine dali nga mipasulod sa biktima ngadto sa ilang panimalay aron di magdako ang kagubot apan  dangtan ang pila ka gutlo migawas ang biktima aron pagtubag sa sugo sa lawas apan gisugat kini sa suspek ug gidunggab ang  liog nga milapos sa iyang bukobuko.

Dali nga gidala ang biktima sa mga kabanay ngadto sa Eversely Child Sanitarium Hospital apan namatay kini.

Nadakpan hinuon ang suspetsado sa mirespondeng mga polis samtang padulong na unta sa iyang pagsibat pahilayo sa maong dapit. (/EIM)  (BANAT NEWS)