CEBU, Philippines - Nadakpan pagbalik sa kapulisan ang usa sa tulo ka mga nakaeskapong piniriso kagahapon sa alas 5:30 sa buntag didto sa pinuy-anan niini sa barangay Bega sa Toledo City.
Gipasakaan usab og kasong obstruction of justice sa kapulisan ang asawa sa usa sa mga pinirisong nakapuga nga maoy gitumbok nga naghatag og gabas nga puthaw nga maoy gigamit pagputol sa mga kabilya sa bintana diin nakalusot ang mga pugante niadtong Sabado sa gabii.
Ang nasikop pagbalik mao si Apolinario Canumay, kinsa dunay kasong frustrated murder. Sumala pa ni SPO4 Carmelito Hornales ang inahan ni Canumay maoy nipahibawo sa kapulisan nga gusto nang motahan sa iyang anak.
Samtang padayong gipangita ang laing duha ka mga pugante nga sila si Nilo Lumbreno, nga nag-atubang og kasong rape ug Joselito Ribaya nga may kasong illegal possession of firearms.
Gipasakaan og kasong obstruction of justice ang asawa ni Nilo Lumbreno nga si Angelina tungod sa pasangil nga kini maoy mihatag sa gabas sa puthaw.
Gikatakda usab nga imbestigahon ang tulo ka mga polis nga nagbantay sa maong presinto atol sa pag-eskapo. (/EIM) (BANAT NEWS)