Polis gipatay sa ‘Buang’

CEBU, Philippines - Patay ang usa ka polis samtang angol usab ang kauban niini human gidunggab sa usa ka lalaking may deperensya sa iyang pangisip pasado alas 9 sa miaging gabii diha sa Sitio Purok Palmera, Barangay Esperanza sa lungsod sa Pilar sa isla sa Camotes.

Ang namatay nailhan nga si PO1 Ryan Saturiño, 27, taga barangay Canduman, syudad sa Mandaue samtang ang angol nailhan usab nga si PO1 Nelson Silao.

Hinuon napusilan patay usab sa mga polis ang gitumbok nga suspetsado nga si Jonathan Cordero, 42, gituohang adunay deperensya sa iyang pangisip.

Sa pakighinabi sa Banat News sa hepe sa kapolisan sa Pilar nga si Insp. Bernabie Cuyoca,  mibutyag nga miresponde ang namatay ug nasamdan nga polis tungod sa pagpangayo og tabang sa usa ka opisyal sa barangay.

Sumala pa nga si barangay councilor Miguel Silao,  midangop sa ilang police station ug nangayo og tabang tungod sa  pagbunal kaniya sa suspek og lipak dihang iyang gisita tungod sa pagpataka og labay og     basura.

Dihang   giposasan na ang suspetsado gikatahong milugnot kini ug nakabuhi ug gi-uboan  si PO1 Saturiño ug mikuha og gunting diha sa iyang bulsa ug gidunggab ang maong polis.

Tungod niini, gipusil ni Piañar ang suspek gikan sa likod hinungdan nga nakaibot sa iyang armas si Saturiño ug nakapabuto tulo ka higayon kang Cordero.

Matud pa ni Cuyoca bisan nasamdan na si Cordero misukol gihapon kini maong napusilan pa gyud kini pag-usab. Samtang si Silao nasamdan usab sa kamot.

Dugang pa ni Cuyoca nga gisuwayan pa pagdala sa Pilar Municipal Health Center si Saturiño apan nakabsan gyud kini sa iyang kinabuhi. (BANAT NEWS)