CEBU, Philippines - Gisaway ni Konsehal Jose Daluz III si Konsehal Sisinio Andales tungod sa pasangil nga dili kini patas nga modumala sa iyang komitiba nga maoy mohimo’g pagtoon kabahin sa mga balaud.
Matud ni Daluz nga gidali-dali ni Andales paghimo og committee report nga usbon ang Budget Ordinance nga gihimo ni Konsehal Rodrigo Abellanosa bisan og bag-o pa kini nga napasaka.
Si Daluz miingon nga aduna siya’y susama nga ordinansa nga gipasaka kaniadto pa’ng tunga-tunga sa Enero nga nag-awhag nga himuon matag tulo ka bulan ipanghatag ang cash assistance sa mga senior citizen.
Apan gusto ni Daluz nga usbon kini himoon lang sa Hunyo ug Disyembre, apan wala kini dayon himoi og aksyon ni Andales, ug mas giuna og gihimoan ni Andales og committee report niadtong Miyerkules ang sugyot ni Abellanosa nga gisang-at niadto lang miaging semana.
Bisan si Konsehal Edgardo Labella, nga usa gihapon ka abogado ug kanhi maoy tsirman sa Committee on Laws and Ordinance miingon nga nakahimo’g sayup si Andales sa pagpalabi sa sugyot nga ordinansa ni Abellanosa bisan bag-o ra kini nga nasang-at.
Si Andales wala kaayo makahatag og tukma nga tubag ngano nga wala niya matagad ang proposed amended ordinance ni Daluz.
Si Daluz alalay sa Team Rama samtang si Andales sakop sa Bando Osmeña Pundok-Kauswagan (BOPK). (BANAT NEWS)