CEBU, Philippines - Usa ka security guard kinsa nasaypang kawatan namatay human kini dunggaba sa wala hiiling kriminal didto sa barangay Basak, dakbayan sa Lapulapu sa miaging gabii.
Ang biktima mao si Dacula Sadat. 23, lumad nga taga Pusong Buog, Zamboanga, Sibogay ug nagtrabaho isip guwardiya sa usa ka establisamento sa dalan A.C. Cortes Avenue sa barangay Ibabao, Cambaro, dakbayan sa Mandaue.
Si PO1 Jade Quiroben sa kapolisan sa Lapulapu miingon nga ang biktima nagsunod sa usa ka saleslady sa usa ka mall nga nailhang si Cecilia Rivera, 22, dalaga nga nagpuyo sa barangay Basak kinsa gikan pa sa iyang trabaho ug naglakaw pauli sa ilang balay.
Pag-abot niini sa ngitngit nga lugar gibati kini og kahadlok sa pagkamatikod niya nga may tawong nagsunod kaniya nga kun iyang lingion kalit lang mohupo busa misinggit kini og panabang sa pagtuo nga kawatan ang diha sa iyang luyo.
Unya misamot ang iyang kalisang dihang mao na lay iyang nakita nga nagbuy-od na sa dalan ang biktima nga naglunang sa dugo niini nga wala nay kinabuhi.
Si PO1 Quiroben miingon nga walay nakatumbok kun si kinsa sa mga molupyo sa maong dapit ang nagdunggab sa biktima.
Matud pa ni PO1 Quiroben nga ang pitaka sa biktima ilang nakuha sa bulsa sa karsones nga adunay ID nga maoy nag-ila sa ngalan ug trabaho niini uban usab sa hulagway sa maong dalaga nga si Rivera. Si PO1 Quiroben midugang nga ang maong dalaga nga ilang gisukitsukit hugtanon nga mihimakak nga hinigugma niya ang namatay ug mialigar pa gani kini nga dili niya kaila ang biktima. (BANAT NEWS)