CEBU, Philippines - Gihan-ay na sa kagamhanan ang tanan aron masiguro nga sa Mayo 13 nga election may igong supply sa kuryente sa tibuok nasud pinaagi sa pagtukod og mga task force nga mobantay sa mga instalasyon sa kuryente alang sa malampusong piniliay.
Sumala ni Regional Director Antonio Labios sa Department of Energy (DOE)7 nga bisan layo pa ang Mayo apan dinhi sa Central Visayas gipalihok na niya ang task force nga maoy gitahasan sa pag-atiman sa supply sa kuryente sa adlaw sa piniliay.
Ang nahisgutang task force gilangkoban sa National Grid Corporation of the Philippines, Philippine Electric Marketing Corporation, National Power Corporation, National Electrification Administration, Philippine Rural Electrification Corporation.
Dinhi sa Cebu ang Visayan Electric Company, (VECO) ug Cebu Electric Cooperative (CEBECO) maoy dako kaayo og tahas sa pagbantay sa supply sa kuryente sa mga siyudad ug kalungoran ug ingon usab niini ang nagkadaiyang siyudad ug lalawigan sa Central Visayas, sumala pa ni Labios.
Midugang si Labios nga ang umaabot nga piniliay karong Mayo maoy ikaduhang higayon nga gamiton sa Commission on Elections (COMELEC) ang mga modernong kahimanan alang sa pagpadali sa resulta sa maong piniliay.
Busa mahinungdanon kaayo ang kuryente nga maoy mopaandar sa maong mga kahimanan.
Hinuon kun unsa kaandam ang DOE, ingon usab niini kaandam ang mga kadagkoan sa Veco ug Cebeco dinhi sa Sugbo.
Si Theresa Sederiosa, Communications Manager sa Veco nagkanayon nga ilang gipaniguro nga ang tanan nilang kahimanan ug mga tawo andam na sa pagbantay sa supply sa kuryente sa adlaw sa piniliay.
Kun may kakulian man gyud, si Sederiosa nagkanayon nga walay angay kabalak-an ang katawhan tungod kay matag voting center may idestino sila nga mga electrician aron mobantay sa dagan sa kuryente.
Samtang si Engr. Lowell Belciña resident manager sa CEBECO, Cebu City Office nagkanayon nga matag election gipakatap nila ang ilang mga electrician sa matag voting center sa kalungsoran ug kabarangayan sa lalawigan aron matubag dayon ang unsa mang problema sa dagan sa supply sa kuryente sa adlaw sa election.
Gumikan niini si Director Labios misalig nga walay mahimong suliran bahin sa sugang dagitabnon sa umaabot nga election tungod kay ang Central Visayas may igong reserba sa kuryente hangtud ug lapas pa sa tuig 2016.
Gawas niini tungod kay pista opisyal ang maong adlaw, walay klase ug daghan usab nga mga balay patigayon ang dili mangabli busa dili kaayo gastuso ang supply sa kuryente sa maong higayon, sumala pa ni Labios. (/WC) (BANAT NEWS)