CEBU, Philippines - Nabugtoan sa iyang kinabuhi ang usa ka police human pusila didto sa sitio Tigbao, barangay Talamban, syudad sa Sugbo sa miaging gabii. Ang biktima nailhan nga si PO3 Wilfredo Datu, sakop sa RPHAU ug kanhi nadestino sa Lapu-lapu City Police Office.
Matud pa ni Tony Punay ,nga nanihapon pa sa iyang kan-anan ang biktima sa wala pa kini pusila sa wala hiilhing kriminal.
Apan dihang mitindog kini kay mobayad sa iyang panihapon, kalit lang miduol ang wala hiilhing lalaki ug giluthang ang bukobuko sa biktima. Dugang pa ni Punay human sa pipila ka segundo nga nagbarug lang gihapon ang biktima human maigo sa bala, hinayhinay kining nalup-og sa hawanan sa kan-anan.
Usban pa unta pagpusil sa kriminal ang biktima nga nagbuy-od sa sawog apan mikagar ang armas niini busa wala makabuto.
Dihadiha migawas dayon ang kriminal ug miadto sa usa ka motorsiklo nga nagpaabot kaniya dili layo sa parkinganan.
Sa paningkamot nga mabuhi pa, gihatud sa mga nakasaksi ang biktima ngadto sa North General Hospital apan giingong dead on arrival kini sa tambalanan.
Matud pa ni Punay nga sa wala pa ang hitabo ang kriminal nga nagpaabot na sa biktima didto mipalit pa og load sa cell phone ug miinom pa og softdrink nga wala magtaptap sa nawong. Nasuta sa mga saksi nga gibantayan niini ang lihok sa biktima kay samtang nag-inom kini og softdrink, dihang mitindog ang biktima kalit kining miduol ug dayon walay daghang pangutana gipusil niini ang polis.
Samtang ang igsoon sa biktima nga si FO3 Raul Datu sa Talamban Fire Station mibutyag nga walay kontra ang iyang igsoon busa nahibulong sila nganong gipusil kini.
Gumikan niini si SPO3 Rey Cuyos sa homicide section sa Cebu City Police Office nagkanayon nga padayon nilang imbistigahon ang maong hitabo aron matumbok ang kriminal ug unsa usab ang motibo nga nagpaluyo sa maong krimen.
(BANAT NEWS)