CEBU, Philippines - Gituki sa mga magbabalaod sa lalawigan ang usa ka ordinansahon nga mag-awhag sa tanang barangay, lungsod ug siyudad sa tibuok lalawigan nga momentinar sa kahinlo niini ubos sa gipaila nga programa nga tawgong Sustainable Cebu.
Ang maong programa gipaila ni Provincial Board member Thadeo Ouano isip hulip sa Expanded Wholesome Environment that Nurtures (eGwen) nga gipatuman sa tanang lugar sa lalawigan.
Tungod kay maayo ang tumong ug epekto sa maong programa gipasabot ni Ouano nga kinahanglang ipadayon kini aron makakat-on ang tanan sa pag-atiman sa kahinlo sa ilang palibot.
Gusto ni Ouano nga aron madasig ang mga mayor sa lungsod ug mga kapitan sa barangay ipadayon gihapon ang paghatag og grado kanila nga samang higayon may premyo gihapon aron mokugi sila sa pagpatahom sa ilang tagsa-tagsa ka lugar.
Matud pa ni Ouano nga ang grado sa matag barangay ibase sa kahinlo, kaluwas sa sakit , proteksyon sa kalikopan, kaantigo mamuhatbuhat, pag-atiman sa mga kabilin ug kultura, ug maayong panggobiyerno.
Gitataw niya nga ang matag barangay, lungsod, ug dakbayan nga makakuha og maayong rating maoy ilhon nga best performer ug makadawat usab og ganti nga ihatag sa kagamhanan sa lalawigan. (BANAT NEWS)