Mga balay sa Mahiga Creek demolison

CEBU, Philippines - Gitakda sa kagamhanan sa dakbayan sa Mandaue nga hingpit  na  nga hawanan   ang  Mahiga Creek, sa barangay  Subangdaku gikan sa mga illegal nga estraktura nga nakasabud  sa  agas  sa tubig sa  maong  sapa.

Hinuon  walay  problema  ang  mga  apektohan  nga  pamilya   kay  giandaman  man  sila sa kagamhanan  og  luna   sa barangay Paknaan nga maoy   ilang  balhinan.

Gumikan  niini  ilusad  sa   kagamhanan  ang  pre-demolition  conference  o  sabotsabot  sa  dili  pa ipatuman  ang  demolisyon nga tambongan sa Commission on Human Rights (CHR)  Presidential Commission on Urban Development, (PCUP) sa mga maapektohan nga mga molupyo ug uban pa.

Si Tony Pet Juanico sa Housing and Urban Development Office (HUDO) sa kagamhanan sa maong dakbayan nga nahinabi sa mga tigbalita nagkanayon  nga  sa komperensya  nga  himoon  masuta kun  unsay  unang  buhaton  sa demolition  team  ug  sa  mga  apektado  nga  mga  molupyo.

Ang  mga barangay nga maapektohan sa demolition mao ang barangay Banilad, Bakilid, Maguikay, Tabok,   sanglit anaa man sa kakuyaw  ang ilang kahimtang sa matag higayon nga madaot  ang  kahimtang  sa  panahon.

Dugang pa niya   nga  gumikan  niining  maong  problema giandam  na  pag-ayo  sa kagamhanan  ang 6 ka  ektarya  nga  luna  sa  Paknaaan  aron  adto  ibalhin  ang   mga  apektado  sa  demolisyon.

Gawas  sa  pagpalapad  sa   mga  kadalanan, giandam na  usab  ang  mga  kanal  ug  imbornal aron  ang  mamuyo  sa maong  lugar  dili  na  mahasol.

Gitataw niya nga  lakip  nga  naandam  mao  ang  linya  sa kuryente, tubig  ug uban  pa.

Si Juanico miingon nga ang access road network sa Cansaga Bay   paingon  ngadto sa maong luna nahuman  na   busa  wala  nay  problema  ang  mga  mamuyo  sa maong  lugar. (/WC) (BANAT NEWS)