CEBU, Philippines - Gibana-banang mokabat sa duha ka milyon ka pesos nga kantidad sa mga imported ug mahalong bag ug bakus ang nakumpiskar sa mga sakop sa Bureau of Customs sa Mactan-Cebu International Airport.
Matud pa ni Lt. Reynaldo Lascota ang Sector Commander sa Customs Police ug CIIS Asst. Chief Franz Angelo Muñoz kadudahan ang maong mga gidudahang kontrabando gisulod sa upat ka kahon.
Kini gidala sa usa ka pasahero gikan sa Hongkong luwan sa Air Philippines flight 2P799. Usa ka residente sa dalan Salinas Drive, sa Brgy. Lahug sa dakbayan sa Sugbu maoy tag-iya niini.
Tungod kay kadudahan kaayo ang maong duha ka kahon nga gi-abandonar gimando dayon ang ni Sub-Port of Mactan Collector Atty. Paul Acazaren ang pagpahigayon og 100% inspection sa maong mga kahon.
Nadiskubrehan sa Customs Examiner nga si Rosa Melmida ang mga mahalong bags ug bakus sama sa Gucci, Cartier, Louis Vuitton, Mont Blanc, Hermes, Bally, Bottega Venetta, Dolce & Gabanna, Bulgari ug Ferregamo diin gibanabana nga mokabat sobra sa duha ka milyon ka pesos. Hinoon susihon pa sa mga eksperto kung orihinal ba o kinopya lamang nga mga produkto gikan sa Hongkong ang maong mga kantidad aron masuta gyud kung pila ang tukmang kantidad niini.
Sa pagkakaron, nakalapas na ang tag-iya niini s a Tariff and Customs Code of the Philippines ubos sa Sec. 1801 ug posibleng madungagan kini og kasong paglapas sa Republic Acto 8293 o Intellectual Property Code of the Philippines kun masuta nga peke ang maong mga gamit.
Ang tag-iya sa maong kargamento hangtod karon wala mopakita sa buhatan sa Customs Port of Mactan hinungdan nga kini gideklarar nga "Abandoned Shipment". (BANAT NEWS)