Tungod sa lungag sa dalan kawani sa munisipyo nadisgrasya patay

CEBU, Philippines - Patay ang usa ka Job order employee sa lungsod sa Sibonga human aksidenteng natagak sa lungag ang motorsiklo niining gimaneho ug nalabay ug nabunal sa gi-parking nga motorsiklo sa barangay Bato sa lungsod sa Sibonga alas 6:30 sa nilabay’ng gabii.

Ang biktima mao si Renato Edulantes, taga Sitio Dugo-an sa barangay Tubod.

Matud ni PO2 Eduardo Semilla sa Sibonga Police Station sa Banat News, gikan sa trabaho ug paingon na untang mopauli ang biktima apan pag-abot sa maong lugar wala makabantay ang biktima sa lungag sa karsada  ug naaksidente.

Nasuta nga ang maong lungag hinimo sa Department of Public Works and Highways, wala hinuoy mi-kompirmar bahin sa maong impormasyon gikan sa maong ahensya sa gobiyerno.

Tungod sa kakusog sa iyang padagan maayong pagkalagpot sa biktima ug didto natugpa sa gi-parking nga motor sa daplin sa dalan.

Daling gidala sa  Vicente Sotto Memorial Medical Center si Edulantes nga wala nay panimuot apan matud pa sa kapolisan gipahibawo sila sa kabanay niini nga nakabsan kini sa kinabuhi tungod sa kadaut nga naangkon sa ulo niini.  (BANAT NEWS)