Langyaw nga miariya’g hugaw sa hotel sikop

CEBU, Philippines - Gipriso  sa kapolisan  ang usa  ka German national  kinsa  miiwang  ug  miariya  og  hugaw sa lobby  sa usa  ka hotel (ngalan gipugngan) human  pasiriti  niini  sa iyang  ihi  ang  usa  ka taxi didto  sa dakbayan  sa Lapulapu sa miaging gabii.

Ang  suspek giila  sa kapolisan  nga  mao si Eckard Ralf Heinz Schwabe, 52,  kinsa  temporaryo nga nagpuyo sa lodging house sa barangay Pusok sa maong dakbayan.

Si PO2  Ramon Velez nga sakop sa tourist police sa maong dakbayan nga nahinabi sa Banat News miingon  nga sa wala pa magbinastos  ang  maong langyaw, miyarok kini  og  pipila ka botelyang  beer  sulod  sa hotel.

Sa  dihang  nalasbag  na  miduol  kini  sa usa  ka taxi  nga naghatud  og  pasahero  sa maong  lugar dayon  gipasiritan  kini  sa iyang  ihi  hinungdan  nga   mihiwasa  sa kasuko  ang drayber  sa maong  taxi.

Unya  matud  pa  ni  PO2 Velez  nga  human mopatil-is  sa iyang  ihi  ngadto  sa taxi , ang langyaw miadto  sa lobby  ug  dayon  mipungko  ug miariya  sa iyang  hugaw  sa hawanan  atubangan sa daghang  tawo.

Gumikan sa kabaho  mialibwag  pagpanagan  ang  mga  guest  sa maong  hotel  pahilayo  sa lugar   nga  gipungkoan  sa suspek.

Matud pa ni PO2  Velez nga dihang  ilang giimbistigar  mitug-an  ang langyaw  nga  naguol  kuno  siya  kay  gibiyaan   sa iyang  asawang  Filipina  ug  gidala  ang  ilang  anak.

Ang  maong langyaw   nga nagtingkagol na  karon  sa prisohan  mag-atubang  og  kaso  nga paglapas  sa RA 329 nga ipasaka  sa tagdumala  sa hotel  batok  kaniya.

Hinuon  ang  drayber  sa taxi  nakahukom  nga  dili na lang  mokiha  sa maong  langyaw. (BANAT NEWS)