DILG nagpaabot pa sa dismissal order batok sa tulo ka opisyal sa Kapitolyo

CEBU, Philippines - Nagpaabot karun ang Department of Interior and Local Government sa opisyal nga kamanduan aron mapatuman ang pagtaktak gikan sa katungdanan sa mga opisyal sa Kapitolyo nga nakit-ang sad-an  sa sayop nga pagpalit sa kontrobersyal nga Balili Property.

Matud ni DILG-7 Regional director Ananias Villacorta atol sa interbyu sa dyDD nagpaabot pa sila sa opisyal nga kamanduan gikan ni Interior Secretary Mar Roxas aron ikapatuman ang maong desisyon.

Gihimong sanglitanan ni director Villacorta ang pagpatuman nila sa unom ka bulan nga suspension order batok ni suspended governor Gwendolyn Garcia kaniadtong petsa 19 sa nilabay’ng bulan sa Disyembre sa niaging tuig.

Ang DILG ug ang Bureau of Local Government and Finance kon BLGF maoy gitahasan pagpatuman sa dismissal sa mga sakop sa Appraisal Committee sa pagpalit sa Balili Property nga sila si kanhi Provincial Treasurer Roy Salubre, Provincial Engineer Eulogio Pelayre ug Budget Officer nga si Emie Gingoyon.

Samtang si Provincial assessor Anthony Sususco nakaretiro na sa katungdanan niadtong niaging tuig.

Si Garcia nga apil sa nakit-ang sad-an sa maong kaso na-absuwelto sa kasong administratiba human masublian sa iyang katapusang termino pagka-gobernador niadtong 2010 election samtang si kanhi bokal Juan Bolo napildi sab sa maong eleksyon.

Hinuon mahimo pang makaapelar ang maong apektadong opisyal sa maong desisyon sa Ombudsman.  (BANAT NEWS)