Nagkanta sa videoke gitadtad og bala patay

CEBU, Philippines - Patay diha diha ang usa ka 50- anyos nga lalaki human gipusil samtang nag- videoke kauban ang iyang asawa pagkahuman gikuha pa sa duha ka mga killers ang iyang kwarta nga syete mil pesos  diha sa Ilig Beach Resort sa Sityo Tiwasan sa barangay Catarman sa lungsod sa Liloan niadtong Miyerkules sa alas 3:30 sa hapon.

Ang biktima mao si Lorenzo Cuizon Baticulon, 50, taga barangay Umapad sa siyudad sa Mandaue samtang padayon pang giila sa kapolisan ang mga tulisan nga duha ka lalaking nag-motorsiklo.

Matud ni SPO1 Claudio Castro Jr., sa Liloan Police Station dihang nahinabi sa Banat News  nagkanta  sa videoke sa maong beach resort ang biktima kauban ang asawa nga si Estrelleta dihang miabot ang mga suspek ug gipusil kini makadaghang higayun.

Dihang natumba ang biktima ug natusak sa bala, ang usa ka suspek nikuha sa pitaka sa biktima  ug daling misibat.

Ang mga polis nga nirespondi sa crime scene daling nitabang sa asawa nga na-shock usab sa nahitabo sa iyang bana. (/EIM)  (BANAT NEWS)