CEBU, Philippines - Gipahibalo sa United Nationalist Alliance nga dinhi sa Cebu City ug dili na sa Toledo City ang ilang proclamation rally karong umaabot nga Pebrero 12.
Usa ka Santos nga Misa ang himuon sa mga sakop sa partido diha sa Cebu Metropolitan Cathedral ug isunod ang motorcade palibot sa siyudad. Human niini himuon dayon ang executive meeting sa partido ug isunod ang press conference diha sa Waterfront Hotel and Casino sa barangay Lahug.
Ang proclamation rally anha himuon sa Heritage Park sa kilid sa Maritima Building sa luyong bahin sa Cebu City Hall. Ang partido tambongan sa mga nag-una nilang mga lider nga mao sila si Bise Presidente Jejomar Binay, kanhi presidente Joseph “Erap†Estrada, Senate President Juan Ponce Enrile ug ingon man ang tibuok lineup sa senate slate sa partido. Gipaabot usab nga manambong ang local UNA members ug mga lokal nga partidong kaalyado niini nga sila si suspended governor Gwendolyn Garcia, Cebu City Mayor Michael Rama, Team Asenso Toledo City pinangulohan ni Toledo City Vice Mayor Arlene Dydee Zambo.
Matud pa sa tigpamaba sa UNA nga si Navotas Rep. Tobias Tiangco sa gipadalang text message dinhi sa Banat News ug sa The Freeman tungod sa budget ug kakuwang sa panahon nadesisyonan sa UNA nga usahon na lang ang plano untang duha ka proclamation rallies nga himuon diha sa Toledo City ug sa Cebu City. Ang tibuok isla sa Cebu adunay 2.5 milyones nga rehistradong botante ug maoy kinadaghanan og botante sa usa lang ka probinsya kun itandi sa ubang probinsya sa nasud.
Kaniadto daghang mga kandidato sa national positions ang nakadaog tungod sa dakong botos nga nakuha gikan sa mga Sugboanon. Gipaabot nga dinhi sa Sugbo magbangga ang duha ka nag-una karong political parties nga UNA ug Liberal Party inubanan sa tagsa-tagsa nila ka mga affiliated local parties. (BANAT NEWS)