CEBU, Philippines - Mikatap kagahapon ang balita sa siyudad sa Mandaue ug nag-trending pa sa Facebook ug uban pang social media sa internet ang giingong wala mag-ukang nga babaye ug lalaking nag-sex sa usa ka pension house sa maong syudad.
Ang maong pares nga wala hinganli gikatahong nagtrabaho sa usa ka pabrika sa preserved foods apan parehong mga minyo.
Sumala pa nga ang duha gidala sa usa ka pang-publikong tambalanan sa siyudad sa Mandaue apan dihang gitawgan sa Banat News ang Mandaue City District Hospital wala sila mo-kompirmar bahin sa maong report.
Matud pa sa report nga nabulag lang ang panagtapot dihang giputol na lamang sa mga doktor sa gidad-an nga tambalanan ang kinatawo sa maong lalaki ug karon padayon pang giatiman sa tambalanan.
Ang maong hitabo maoy gikagubtan karon sa mga kauban nga trabahante sa pabrika tungod kay giingong wala na ang duha mobalik sa trabaho.
Gisulayan sa Banat News sa pagsusi ang maong pabrika ug ilang gikumpirmar ang maong panghitabo sa kauban nilang trabahante ug gitug-an usab nila ang tambalanan nga gidad-an niini.
Apan sa pagsusi sa Banat News sa gitumbok nga lodging house hugtanon nila kining gihimakak sa pipila ka mga roomboy nga nahinabi.
Bisan si Insp. Ramil Morpos ang hepe sa Mandaue City Police Office Homicide Section nga miadto sa maong lodging house sa Facebook account sa sibyaanang DyLA miingon nga dili kini tinuod.
Hinuon gibutyag sa usa sa mga roomboy kang Morpos nga niadtong adlaw nga Sabado dunay usa ka babaye ug lalaki nga mi-check in pasado alas-onse sa buntag ug dangtan pila ka minutos migawas ang babaye ug nangayo og tabang kay gi-atake sa sakit sa kasingkasing ang iyang kaubang lalaki.
Ang maong lalaki gikatahong gidala sa tambalanan. (BANAT NEWS)