CEBU, Philippines - Gisugyot ni vice gubernatorial candidate Glenn Soco nga angay itugyan sa pribadong sector ang pagdumala sa Suroy Suroy sa Sugbo ubos sa pagpanguna karon ni Acting Governor Agnes Magpale.
Si Soco nipalanog sa maong sugyot human masuta niini nga dyutay ra ang mga misalmot sa Suroy Suroy sa Sugbo sa miaging adlaw.
Busa matud pa ni Soco nga mas maayo pa nga itugyan kini ngadto sa Cebu Chamber of Commerce and Industry (CCCI) aron dili kini maduhigan og kolor sa politika.
Nasayran nga usa sa tinguha sa kagamhanan sa lalawigan ning maong kalihukan mao nga aron ma-ila pag-ayo sa mga turistang local ug langyaw ang mga kalungsoran sa lalawigan sa Sugbo.
Dugang ni Soco nga sa sinugdanan gi-conceptualize ang Suroy Suroy sa Sugbo sa business sector apan gisagop kini sa kagamhanan sa probinsya sa Sugbo tungod sa ka-epektibo niini.
Si Soco nagkanayon nga kun buligan siya sa katawhan sa umaabot nga eleksiyon karong Mayo iyang paningkamotan nga mainila pag-ayo ang Suroy-Suroy Sugbo ug itugyan pagbalik ang pagdumala niini ngadto sa business sector.
Gawas sa business sector aduna pay ubang kasaligang grupo nga mahimong maoy modumala niini sama saTravel and Tours Operators, mga kapunongan sa mga magpapatigayon nga takus alang ning maong aspeto.
Gipasabot ni Soco nga dili gyud kalikayan nga maduhig sa politika ang maong aktibidad tungod kay mga politiko man ang mokuyog-kuyog niini.
Gituohan ni Soco nga usa sa nakaapektar sa subsob nga media coverage sa Suroy Suroy sa Sugbo mao ang migawas nga pamahayag ni acting governor Magpale nga adunay mga sakop sa media nga nagdawat og suweldo sa Kapitolyo gikan ni suspended governor Gwendolyn Garcia. (WC) (BANAT NEWS)