CEBU, Philippines - Ilegal nga drugas maoy gitan-aw sa kapulisan nga motibo sa pagpusil patay sa ig-agaw sa bise mayor sa siyudad sa Carcar adtong Biyernes sa gabii.
Si Supt. Eduardo Saavedra, hepe sa Naga City Police Station, mibutyag nga si Erwin Barcenas, 46, nalambigit sa illegal nga drugas base sa impormasyon nga ilang nadawat ug siya midugang nga makaduha na ka higayon kini nga nadakpan sa Philippine Drug Enforcement Agency (PDEA)-7 apan nakapiyansa kini.
Matud sa usa ka reliable source nga muhimo unta sila og test buy kang Barcenas human sa daghang report nga ilang nadawat apan wala na kini mahinayon human mapusili niadtong nakalabay nga adlaw ang biktima.
Gawas pa niini gikatahong adunay hulga sa kinabuhi ang biktima apan wala lang niini panumbalinga. "Gibadlong na kuno ni pero wala lang gihapon patuo kay giplanuhan na," matud ni Saavedra.
Si Barcenas gipusil patay samtang nagsakay sa motorsiklo sa amigo niini nga si Jonathan Sagalili sa Barangay Tuyan. (BANAT NEWS)