CEBU, Philippines - Disi-sayes ka mga traffic enforcers sa City Traffic Operations Management (CITOM) nga unang nag-positibo sa ilegal nga drugas sa gihimong random drug test apan nigawas nga negatibo sa confirmatory test ang gi-rehire og balik sa siyudad sa Sugbo.
Apan dunay laing trese ka mga traffic enforcers ang dili na ma-renew ang kontrata ini og Enero 31.
Matud pa ni CITOM Assistant Department Head Rafael Christopher Yap ang trese ka enforcers nga naglakip sa duha ka parking aides nasakpang wala kanunay sa ilang mga pwesto, sige og ka-late ug ang uban daghang mga pending nga reklamo batok nila.
Pipila sa mga reklamo batok kanila naggikan sa mga motorista tungod sa pagpangilkil. Ang maong trese ka enforcers mga casual employees nga tag-unom lang ka bulan ang kontrata.
Wala pa matino kung makadawat gihapon sila sa gisaad nga katunga P20,000 nga bonus ni Mayor Michael Rama sa nakalabay nga tuig tungod kay matud pa ni Yap ang Human Resource and Development Office na maoy magbuot niini.
Hinuon daan nang gipahibalo ni Rama nga kadtong mga nakadawat sa unang katunga sa bonus makadawat gihapon sa katunga niini.
Kabahin sa 16 ka enforcers, wala sila tuguting maka-report sa trabaho human sila mag-positibo sa random drug test apan karong napamatud-ang negatibo ang confirmatory test gibalik sila sa trabaho tungod kay matud pa ni Yap way rason aron sila dili dawaton pagbalik.
Dunay 74 ka mga traffic enforcers nga gi-drug test gikan sa 300 ka mga traffic enforcers niadtong tungora ug ang 16 maoy migawas nga positibo. (BANAT NEWS)