CEBU, Philippines - Gisikop sa kapolisan ang usa ka Australiano ug gipriso human kini manghasi gumikan sa kahubog didto sa barangay Pusok, dakbayan sa Lapulapu sa miaging gabii.
Si Ernest Grahame Whiting, 61, minyo, Australian national, kinsa mibakasyon dinhi kay misaksi sa milabay nga Sinulog didto mahuwasi sa kahubog sa prisohan sa Presinto 5 sa Lapulapu City Police Station.
Si SPO3 Jose Roel Nalzaro sa kapolisan sa Presinto 5 nga nagbase sa barangay Pusok sa maong dakbayan mibutyag sa Banat News nga ilang nadawat ang alarma gikan sa nagdumala sa usa ka de kalidad nga kan-anan sa barangay Pusok labot sa panag-away nga Australian national ug sa asawa niini nga Filipina.
Matud pa niya nga padulong na sa Mactan Cebu International Airport ang magtiayon alang sa ilang biyahe ngadto sa Australia.
Apan tungod kay gigutom sila mihapit una sila sa usa ka kan-anan kay nanihapon dihang pagkahuman nila og kaon miyarok ang Australiano og pipila ka botelya nga beer.
Tungod kay hapit na ang oras nga molarga ang abyon nga ilang sakyan, gimandaran sa asawa ang langyaw nga ipahurot og dali ang gilala niining beer aron dili sila mabiyaan sa eroplano.
Apan matud pa mihiwasa sa kasuko ang langyaw nga misangpot sa ilang panaglalis.
Ang security guard sa maong kan-anan maoy mitawag og polis.
Pag-abot sa mga polis sa maong lugar misamot kasuko ang Australiano busa ila kining gisikop ug gipaslak sa detention cell isip safe keeping niini.
Hinuon dihang nahuwasan na sa iyang kalasbag gibuhian kini sa kapolisan ug mipadayon ang magtiayon sa ilang biyahe pauli ngadto sa Australia. (WC)(BANAT NEWS)