Trade fair sa ika-62 nga kasaulogan sa DSWD7 ipahigayon

CEBU, Philippines - Usa  ka trade  fair  ang  ipahigayon  sa  Department of Social Welfare and Development (DSWD)7 sa ika-62  nga anibersaryo  niini  karong Enero 25, 2013 nga  mopasundayag  sa nagkadaiyang  mga  produkto  sa  panginabuhi  nga may  labot  sa  Sustainable Livelihood Program (SLP) sa maong  ahensya.

Sumala pa ni Jaybee Binghay, tigpamaba sa DSWD-7 nga gawas niini ang mga gibansay-bansay nga Persons with Disabilities (PWD's) nga gikan sa Area Vocational Rehabilitation Center (AVRC) II sa DSWD  motanyag  usab  og masahe  sa publiko ug  gani  nagsugod  na  sila  niadtong  Lunes ug  magpadayon  hangtud  sa Biyernes  sa lobby sa DSWD Regional Office  sa barato  nga  bayranan.

Dugang pa ni Binghay nga subay sa temang "Sama-samang Husay, Tungo sa Tagumpay", ang buhatan sa DSWD-7 mopahigayon  usab  og usa ka espesyal nga culminating program ug awarding ceremony aron kahatagan og espesyal nga pasidungog ang mga takus nga mga empleyado.

Gipadayag ni Binghay nga ang mga mananaog naglangkob kanila  ni Social Worker Alieta Austero nga  gikan sa DSWD Team Office sa Negros Oriental kinsa modawat og award isip Best Social Worker niining tuiga, samtang si DSWD-7 Nutritionist Melinda Canares makadawat usab og award isip Best Technical Staff Professional Category, makadawat usab og pasidungog   si Jerry Ruiz, Information Technology Officer isip Best Technical Staff- Sub-Professional level samtang Best Support Staff-Sub Professional level usab ang madawat ni Elisa Camus sa Institutional Development Division (IDD). Laing makadawat og pasidungog   mao  ang mga kontraktwal nga mga trabahante kinsa nagserbisyo sa ahensya sa DSWD-7 sulod sa kapin  na sa tulo na ka tuig mao sila si Maricor Caballero sa AVRC, Leo Sevilla, Regional Information and Communication Technology Management System (RMIS) ug usab si Ruben Boybanting sa National Household Targeting System for Poverty Reduction (NHTS-PR) office nga maoy pasidunggan isip Best MOA staff samtang ilakip  usab  ang 21 ka mga regular staff ang pasidunggan tungod sa ilang maayong serbisyo ug pagkamaunongon sa buhatan sa DSWD sulod sa napulo, 15, 20, 25, 30 ug 35 na ka katuigan.      

Aduna usay 16 "Salamat Po" awards nga ihatag sa buhatan sa DSWD-7 ngadto sa nagkadaiyang kaabag niini sa  goberno ug non-government organizations samtang ang Gawad Paglilingkod sa Sambayanan (GAPAS) ihatag usab ngadto sa outstanding Local Government Unit (LGU) ug Gawad Ulat usab ang ihatag ngadto sa mga napiling mga media outfit. (BANAT NEWS)