CEBU, Philippines - Kapin usa ka gatus ka libo ka pesos ang nasakiyo dihang gilungkab ang usa ka lending firm nga nahimutang didto sa barangay Sto. Rosario siyudad sa Bogo apan mga alas 8:00 sa buntag na kini nahibaw-an sa adlaw nga Miyerkules.
Ang gilungkab mao ang G and O Enterprise nga gipanag-iya sa negosyante nga si Dominga Ortega Glane, 82, nagpuyo sa barangay San Vicente Bogo.
Ang nahanaw mao ang kwarta sa maong kompaniya nga P35 mil ug duha ka tseke nga nagkantidad og tag 60 mil pesos ug laing cheke nga 50 mil pesos.
Matud ni PO3 Ryan Alarde sa Bogo City Police dihang nahinabi sa Banat News gilungkab sa kawatan ang aircon unit sa luyong bahin sa establisamento ug didto misulod.
Duna nay gidudahang tawo ang mga kawani ug ang mismong tag-iya sa maong establisamento.
Sa laing bahin, moabot og 50 mil pesos nga kwarta ug mga bulawang alahas ang nasakiyo dihang gilungkab ang pinuy-anan ni Milagros Mission, 60, diha sa barangay Bagay, lungsod sa Daanbantayan sa ala 1:43 sa hapon.
Matud ni PO2 Rammil Claro sa Daanbantayan Police Station sa Banat News ang pag-umangkon sa biktima nga si Arnel Magalie, maoy nakabantay sa gitangtang nga window grill sa balay nga diin milusot ang kawatan.