CEBU, Philippines - Gibutang na sa heightened alert ang lukop Rehiyon 7 subay sa ikaduhang adlaw sa election campaign ug sa pagpatuman niini sa gun ban.
Niadtong unang adlaw sa pagpatuman sa gunban usa gilayon ka negosyante ang nasikop human naghupot og illegal nga armas ug kagahapon usa ka wanted nga lalaki ang nadakpan usab sa siyudad sa Danao ug nakuhaan usab og armas ingon man mga bala.
Matud pa sa tigpamaba sa Police Regional Office-7, Supt. Clifford Gairanod nga wala silay pasayloon nga bisan kinsa pa ilang masikop nga nakalapas sa balaod.
Dugang pa ni Gairanod nga unta ang kapolisan usab dili magpahaylo sa ilang mga dinakpan kini aron usab dili mapasakaan og kasong administratiba.
Samtang ang hepe sa Police Community Relation nga si Supt. Armando Radoc miingon nga ang kapolisan magpadayon sa pagpahigayon og police checkpoints sa kadalanan. (BANAT NEWS)