CEBU, Philippines - Mokabat sa P1.2 bilyones ang target sa Cebu City Treasurer’s Office nga makolekta niining ilang pagpang-renew sa mga business permit kansang deadline gitagal nga kutob ra sa Enero 21, 2013.
Ang kagamhanan sa siyudad miumol og one stop shop sugod kagahapon sa SM Trade Hall aron tulin ug paspas ang proseso ug dili maghuot ang mo-renew sa ilang business permit ilabi na nga gibana-bana nga linibo ka mga tawo ang mo-apply niini.
Sumala pa ni City Treasurer Emma Villarete nga importante kaayo ang kooperasyon sa katawhan sanglit kining ilang ibayad iuli ra man usab kini ngadto kanila pinaagi sa nagkadaiya nga mga proyekto sa siyudad.
Gipahimangnoan usab niya ang mga negosyante nga motuman gyud sa gihatag nila nga deadline aron dili sila makabayad sa penalty nga 25 porsento.
Samtang may laing 2% matag buwan nga laing penalty nga ipahamtang kung ang hingtungdan padayon nga dili makapabag-o sa iyang business permit. Nasayran nga pipila na ka tuig nga gipatuman kini sa kagamhanan ning siyudad nga adto ipahigayon sa laing establisamento ang pagpangluwat og business permit sa panahon nga magkaduol na ang renewal niini.
Linibo nga mga aplikante ang ilang masilbihan kun dako ang lugar ug may igo usab silang gidaghanon sa mga lingkoranan nga kapahuwayan samtang magpaabot ang usa ka aplikante sa iyang papeles.
Sayo niini daan na nga gipadayag ni Mayor Michael Rama nga kung aktibo ang mga tawo sa pagbayad og buhis nagpasabot nga daghang mga kabos ang matabangan niini pinaagi sa maayong proyekto. (WC) (BANAT NEWS)