CEBU, Philippines - Gihangop sa kaliboan ka mga senior citizen sa ika-unom nga distrito sa lalawigan sa Sugbo ang nadawat nilang pinaskohan gikan ni Board Member Thadeo Ouano
Kauban ni Ouano sa pagpanghatag sa maong mga pinaskohan sa mga edaran sa dakbayan sa Mandaue mao si Konsehal Emmarie Lollipop Ouano Dizon nga mibubo sa kaugalingon niyang salapi alang sa maong pinaskohan sa mga senior.
Samtang didto sa Consolacion ang kauban ni Ouano sa pagtunol sa maong mga pinaskohan sa mga senior sa maong lungsod mao si Konsehal Alfie Ouano kinsa sama kang Konsehal Ouano-Dizon mipagawas usab sa kuwarta nga gikan sa iyang bulsa aron may ikapahalipay sila sa mga edaran sa maong lugar.
Ang managsuong konsehal nga anak ni Board Member Ouano nagkasabot sa pagduyog sa ilang amahan sa pagpakigsuod sa mga edaran nga molupyo sa distrito 6.
Ang ilang gipanghatag mao ang mga pinutos nga may duha ka kilong bugas, sardinas, noodles, payong ug may salapi usab.
Sa nasayran nga ang lungsod sa Cordova nga sakop sa ikaunom nga distrito may 13 ka barangay, 21 ka barangay sa Consolacion ug 27 ka barangay sa dakbayan sa Mandaue ug ang tanang senior citizen sa maong mga barangay pulos nakadawat og pinaskohan. - /WC (BANAT NEWS)