Mga tambalanan gialerto na aron moatiman sa mga biktima sa pabuto

CEBU, Philippines -  Andam na ang Cebu City Medical   Center (CCMC) sa bisan unsa nga emerhensya ilabi na niadtong mga mabiktima unya sa mga pabuto nunot sa pagsugat sa Bag-ong Tuig karong tungang gabii.

Sumala pa ni CCMC  chief nga si Dr. Gloria Duterte nga niadtong Pasko pa lang sila nga nakaalerto ug ilaha na nga giandam ang tulo ka areas sa maong tambalanan diin atimanon ang mga biktima sa pabuto.

Nagkanayon si Duterte nga tradisyon na gyud nga kini nga bisan asa nga tambalanan nga nakaalerto sa Bag-ong Tuig sama sa gihimo nila niadtong Pasko. Matud pa niya nga pinasubay kini sa gimando sa nasudnong buhatan sa Department of Health  nga i-isa code white alert status sa tanang mga ospital nga ubos sa pagdumala sa DOH nga gisugdan na niadto pang Disyembre 25 ug hangtud na kini ugmang adlawa.

Ubos sa maong status, ang tanang mga ospital kinahanglang dunay igong gidaghanon sa mga medical personnel, ekipo ug tambal aron dali nga matagad ang mga biktima sa pabuto.

Gihangyo ni Duterte ang publiko nga dili na lang magpabuto aron maseguro ang kaluwasan ug sugyot niya nga labing maayo nga mogamit na lang og turotot  aron mas sadya ang selebrasyon.

Una na nga mimando ang dakbayan sa Sugbo nga kinahanglan nga ang mga barangay  mobutang og mga firecracker zones diin didto lang mahimong magpabuto ang mga tawo o motan-aw og mga fireworks display aron malikayan ang mga disgrasya.

Samtang si Mayor Michael Rama padayong mo-istrikto sa pag-implementar sa ordinansa nga sa South Road Properties (SRP) ra gyud ang display sa gipamaligya nga pabuto.

Nagkanayon si Rama nga padayon gihapon karon ang paggukod sa Task Force Pabuto ngadto sa mga tindahan nga nagtago-tago sa pagpamaligya og pabuto.    

Hangyo niya sa mga negosyante nga motuman na lang gyud sa balaod sanglit peligro kaayo sa sunog kung bisan asa lang ipahimutang ang mga pabuto. Samtang alerto na usab ang tambalanan sa dakbayan sa Lapulapu  sumala pa ni Lapulapu City Health Officer Dr. Rodolfo Berame sa pakighinabi sa Banat News.

Nagpasalamat si Berame nga sa milabay’ng Pasko duha lamang ka kaso sa pabuto ang natala sa Lapulapu District Hospital.

Karong gabii sa pagsugat sa Bag-ong Tuig gialerto ni Berame ang tulo ka tambalanan sa dakbayan nga mao ang Mactan Doctors Hospital, Our Lady of the Rule General Hospital ug ang Lapulapu City Hospital sa pagpangandam.

Gihangyo usab ni Berame ang mga residente sa paglikay og gamit sa mga ilegal nga matang sa pabuto ug did-an ang mga bata ubos sa singko anyos nga mogamit og pabuto ug bantayan silang dili mamunit og mga pabuto. (EIM)(BANAT NEWS)