CEBU, Philippines - Posibleng mag-atubang og kaso si Paolo Garcia, anak sa nasuspensong gobernadora Gwendolyn Garcia, ug ang usa ka ahente sa National Bureau of Investigation (NBI) gumikan sa giingong pagpanghapak niini sa ulo sa usa ka polis gamit ang iyang kamot sa hawanan sa Kapitolyo sa miaging adlaw.
Ang hepe sa Fuente Police Station nga si Senior Inspector Chuck Barandog nagkanayon nga mopasaka sila og kasong direct assault o kalapasan sa Article 148 sa Revised Penal Code batok kang Paolo ug sa ahente sa NBI nga si Joey Cal.
Matud ni Barandog nga kagahapon unta sa buntag nila ipasaka ang kaso sa Cebu City Prosecutor’s Office apan napakyas sila sa pag-apas sa deadline kay sa buntag ra bukas ang korte basta adlaw’ng Sabado.
Ang hepe sa Police Regional Office (PRO)-7 nga si Chief Superintendent Marcelo Garbo, Jr. pinaagi sa text message mipahibawo sa mga sakop sa media kagahapon nga mopasaka sila og kaso batok kang Paolo ug Cal ug si Barandog maoy gitahasan niini.
Gikataho nga si Cal nakuha sa usa ka television news footage nga mihapak sa iyang kamot kang Inspector Alvin Enguito sa Regional Public Safety Battalion.
Si Enguito usa sa mga gidestino sa Kapitolyo aron sa pagmentenar sa kahapsay ug kalinaw.
Matud usab ni Barandog nga gawas sa footage adunay mga saksi ang giingong mitudlo sa ahente sa NBI nga mihapak kang Enguito.
Si Barandog nagkanayon nga si Paolo iapil sa pagpasaka og kaso tungod kay uban siya sa grupo ni Cal dihang si Enguito gihapak sa ulo niadtong Miyerkules sa hapon sa hawanan sa Kapitolyo samtang ang maong polis nanghatag og instruction sa iyang mga sakop.
Ugmang adlawa gitakda ang pagsang-at sa kaso nga dumalahon ni Barandog tungod kay ubos man sa iyang hurisdiksyon ang Capitol area.
Ang pagduso og kaso, base usab kini sa desisyon ni Enguito ubos sa tambag sa iyang labaw tungod kay isip unipormado wala siya respetohi sa mga hingtungdan. Si Enguito gipasidunggan ni Garbo tungod sa wala niini manimawos ngadto sa mihapak kaniya.
Ang direktor sa PRO-7 mihatag og kamanduan sa iyang mga sakop nga nadestino sa Kapitolyo sa pagpatuman sa maximum tolerance. (Brenda D. Batuto ug Niña G. Sumacot sa The Freeman/WC)