CEBU, Philippines - Patay ang usa ka 23-anyos nga drayber sa traysikad human kini aksidenteng nabanggaan sa usa ka Toyota Vios nga sakyanan niadtong Huwebes sa gabii diha sa Cebu South Coastal Road habig sa barangay San Roque, dakbayan sa Talisay.
Ang biktima mao si Ruel Cabanes, taga barangay Tanke sa nahisgutang siyudad daling gidala sa Talisay Rescue Emergency Action Team (TREAT) ngadto sa Talisay City District Hospital apan wala na kini makaabot nga buhi sa maong tambalanan.
Ang drayber sa nahisgutang sakyanan mao si Justin Paolo Mabitad, 18, residente sa barangay San Isidro, Talisay.
Sa imbestigasyon sa mga polis si Mabitad nagbiyahe kini gikan sa dakbayan sa Sugbo paingon nang mopauli samtang si Cabanes nagduso kini sa iyang traysikad diha sa may gutter sa karsada.
Sa kangitngit sa dalan wala makabantay si Mabitad kang Cabanes hinungdan nga nadaro kini sa sakyanan hinungdan sa iyang kamatayon.
Si Mabitad nagtingkagol kini sa Talisay City detention cell. (/EIM (BANAT NEWS)