CEBU, Philippines - Dul-an sa 2.5 milyones pesos nga kantidad sa mga video karera machines, mole- mole ug bingo machines ang gipangguba sa mga kadagkuan sa Cebu City Police Office kagahapong adlawa.
Miabot sa 214 ka mga makina sa sugal ang giguba nga gikan nasakmit sa nagkadaiyang mga operasyon sa mga police stations gipanguluhan sa buhatan sa City Intelligence Branch.
Ang hepe sa kapolisan sa dakbayan sa Sugbo, Sr. Supt. Melvin Ramon Buenafe mibutyag nga sila seryoso sa kampanya sa pagsumpo sa ilegal nga sugal.
Samtang karung adlawa mao usab ang unang adlaw sa lima ka mga intelligence officer nga mo-report sa buhatan sa Regional Investgation Division alang sa refresher course seminar.
Usa sa mga moreport mao si City Intelligence Branch Chief Romeo Santander nga hulipan ni Inspector Rey Valmoria.
Gipasalig usab ni Buenafe nga andam siyang moabag kang Valmoria kun ugaling magkinahanglan kini sa iyang tabang.
Kahinuduman nga lima ka mga intel officer ang gipalagpot sa ilang pwesto human napakyas sa pagpatuman sa hugot nga kampanya sa ilegal nga sugal sa Lapu-lapu City Police Office, Mandaue City Police Office, Cebu Provincial Police Office, Cebu City Police Office ug Negros Police. (EIM)(BANAT NEWS)