4 mangingilad nadakpan

CEBU, Philippines -  Usa ka lalaki nga nagpailang manager sa usa ka kumpanya ang giaresto human mangilad sa usa ka telecommunications company pinaagi sa paggamit og pekeng pangalan, sa usa ka uptown mall sa dakbayan Huwebes sa gabii.

Ang suspetsado na si Rodel Repdos kinsa mag-atubang unya og kasong estafa ug kalapasan sa Anti-Alias Law sa pagpangilad niini sa Globe Telecom, Inc.

Si Repdos nadakpan pinaagi  sa usa ka entrapment operation nga gipahigayon sa opisina sa maong kumpanya dihang mo-claim na usab unta kini og laing gadget gamit ang laing pangalan.

Si Gerald Bechayda, security officer sa Globe, miingon nakakuha na si Repdos og mahalong cellular phone gikan sa ilang branch sa niaging November 29 pinaagi sa ilang post-paid plan.

Si Repdos, migamit og pangan sa usa ka Nonito Montemayor ug siya Unit Manager sa Cocolife Insurance na nakabase sa Fuente Osmeña, ug nakakuha og Samsung Galaxy Note 2 nga nagkantidad og P32,990.

Si Bechayda miingon nga magpakaaron–ingnong usa ka trabahante sa usa ka kompanya ang suspek ug ang teleponong ihatag ug pangalan kunohay sa makatubag sa pagkatawo niini kakunsabo ra diay.

“May kasamahan siya. Kung tatawagan mo ang contact number ng company na ibibigay nila, it turns out na kakutsaba pala nila iyon,” matud pang Bechayda.

Samtang, laing tulo ka mga mangingilad ang nasikop  human sila mogamit og credit sa laing tawo atol sa ilang pagpangompra og groceries sa usa ka dakong tindahan sa Brgy. Subangdaku dakbayan sa Mandaue.      

Ang mga suspek mao sila si Crescencio Arresgado, 43, lumad nga taga Carcar Cebu apan temporaryong nagpuyo sa Private Road Brgy. Sambag 1 siyudad sa Sugbo; Gerald Ortiz, 27; ug residente sa Sitio Plaza Brgy. Apas, ug si Sapphire Zafra, 25, taga Brgy. Tuyan, Naga dinhi sa Sugbo.

Matod sa kapulisan nga nahibaw-an ang binuang sa tulo human usa ka 43-anyos nga negosyante ang mireklamong gigamit og laing tawo ang iyang credit card diha sa usa ka dakong tindahan sa Mandaue.

Inabagan sa kooperasyon sa mga trabahante sa maong tindahan nadakpan ang tulo dihang misuway na usab sila og gamit sa credit line sa maong negosyante.

Naabtan pa sa kapolisan ang tulo nga na-busy sa ilang pagkarga sa ilang “gi-shopping” nga miabot og P31, 414 gamit ang pangalan sa maong negosyante. Nasuta nga sa unang pagpangompra sa mga suspek miabot kini og P27 mil.

Nasuta usab nga si Zapra kanhi trabahador sa tindahan nga gipangomprahan  maong walay sami ang ilang transaksyon.

Kasong estafa ang gipasaka ngadto sa Mandaue City Fiscals Office batok sa tulo, apan matud ni PO1 Jerson Entice, desk officer Police Station 2 mipiyansa ang tulo ug nakagawas na sa prisohan.  (BANAT NEWS)