Walo ka toneladang basura nahipos sa SRP

CEBU, Philippines -  Moabot ngadto sa kapin sa walo ka toneladang basura ang nahipos sa mga sakop sa Department of Public Services (DPS) diha sa venue sa National Thanksgiving Mass ni San Pedro Calungsod niadtong Biyernes diha sa South Road Properties diin dul-an sa usa ka milyon ang mitambong niini.

Sumala pa sa pangulo sa DPS nga si Engr. Dionisio Gualisa nga 95% sa maong basura nagikan sa mga sudlanan sa mineral water ug plastic bags, samtang ang nahibilin nga 5% nagikan sa mga papel ug kinan-an.

Matud pa ni Gualisa nga kapin sa 400 ka mga sakop sa DPS ang gipa-duty niya sa maong adlaw aron masiguro nga limpiyo ang dapit human sa kalihukan.

Mapasalamaton si Gualisa gumikan kay gawas sa mga sakop sa DPS, mitabang usab ang mga volunteers gikan sa nagkadaiya nga barangay sa dakbayan sa Sugbo sa paglimpiyo sa SRP.

Sumala pa ni Gualisa gamay ra kaayo kini itandi sa ilang gipaabot nga gidaghanon sa mga mabiling basura tungod kay dunay mga nanambong nga mibitbit sa ilang kaugalingong basura sa ilang pag-uli.

Panghinaut niya nga ipabilin unta sa mga tawo ang maong kinaiya sa bisan unsa nga mga kalihukan nga ilang tambongan.

Samtang gawas sa SRP, aduna pu’y mga sakop sa DPS ang gipangdestino sa nagkadaiya nga mga kadalanan sa dakbayan sanglit nagbaha kagahapon ang mga bisita nga mitambong. (EIM)(BANAT NEWS)